„იაგუარ I-პეისი“ შოტლანდიის წლის ავტომობილად დაასახელეს

„იაგუარის“ ელექტრომობილი „I-პეისი“ შოტლანდიის წლის ავტომობილად დაასახელეს. გარდა ამისა, ამავე ავტომობილს წილად ალტერნტიულ საწვავზე მომუშავე საუკეთესო ავტომობილის წოდებაც ხვდა. ამავე კონკურსის ჟიურიმ, უგზოობის საუკეთესო ავტომობილად, „იაგუარ E-პეისი“ დაასახელა.

რამდენიმე დღით ადრე, „იაგუარის“ პირველი სერიული ელექტრომობილი, გერმანიის წლის ავტომობილი გახდა. ეს პირველი შემთხვევაა, როცა „იაგუარი“ გერმანიაში ამ კონკურსს იგებს. ამასთან, „I-პეისისთვის“ ეს ზედიზედ მეოთხე აღიარებაა.

გარდა იმისა, რომ ელექტრომობილია, ქროსოვერი „I-პეისი“ სპორტული ავტომობილისთვის შესაფერისი მახასიათებლებითაც გამოირეჩევა - ადგილიდან 100 კმ/სთ სიჩქარის მიღწევა 4.5 წამში შეუძლია. მისი სვლის სიშორე კი 470 კილომეტრის ფარგლებშია (WLTP ციკლით).

სტანდარტული (50 კილოვატიანი) დასამუხტი სისტემით, „I-პეისის“ ელემენტების ბლოკის 80 პროცენტით შევსებას 85 წუთი სჭირდება. სახლის დასამუხტი სისტემით (7 კილოვატი) კი, იგივე რაოდენობით ენერგიის მისაღებად, 10 საათია საჭირო.

„იაგუარ I-პეისი“ ბაზარზე მარტში გამოვიდა და მას შემდეგ, მთელს მსოფლიოში, 16 ჯილდოს მოპოვება მოასწრო. მათ შორისაა „სანდი თაიმსის“ წლის ავტომობილის წოდება, ასევე გამოცემების, „ავტო ექსპრესის“ და T3-ის მსგავსი აღიარებები და გამოცემა „ავტოქარის“ პრიზი „გეიმ ჩეინჯერ“ (პირდაპირი მნიშვნელობით, თამაშის შემცვლელი - იგულისხმება ნოვატორი).