„ლენდ როვერი“ ძაღლებს 5-ვარსკვლავიან პაკეტს სთავაზობს

...უფრო სწორედ, მათ მფლობელებს! პაკეტში, რომლის დასახელებაა „პეტ პაკ“, ძაღლების პიკნიკზე კომფორტულად გადაყვანისთვის საჭირო ნივთები და შხაპის ჩანთაც კი შედის, რომლითაც ბუნებაში ნავარდის შემდეგ, დაბანთ და გაასუფთავებთ.

ბრიტანულმა კომპანიამ თავის მომხმრებლებს ასეთი, ერთი შეხედვით უცნაური შეთავაზება, ძაღლების საერთაშრისო დღესთან (26 აგვისტო) დაკავშირებით მოუმზადა. თანც არჩევანში ერთბაშად სამი პაკეტია, რომლებიც ფასით და ეკიპირებით არის განსხვავებული. მათში შევიდა დასაკეცი ზღუდე, რკინის ასასვლელი ბილიკი, რომელიც ასევე დასაკეცია, ბრჭყალებისგან დამცავი ფენა, მცირე ზომის სახლი, რომელსაც აქვს სარკმელი და ადვილად ეტევა საბარგულში, ასევე ჩანთის ფორმის პორტატული საშხაპე მოწყობილობა, მცირე ავზით.

ალბათ იტყვით, რაში სჭირდება ძაღლს ასასვლელი ბილიკი, საბარგულში შეხტომა ხომ ძაღლებს არ უჭირთ. მაგრამ ხომ არსებობენ მინიატურული ძაღლებიც, რომლებისთვისაც ასე მაღლა ახტომა შეუძლებელია. არიან მძიმე და ხნიერი ძაღლებიც, რომლებისთვისაც ეს ძნელი სავარჯიშოა. ლითონის დასაკეცი ბილიკი 85-კილოგრამიან დატვირთვას უძლებს. საშხაპე 6.5 ლიტრ წყალს იტევს და მისი მეშვეობით ოთხფეხა მეგობრის დაბანა, ხუთი წუთი განმავლობაში არის შესაძლებელი.

კომპლექტი „პეტ პაკ“ „ლენდ როვერის“ ყველა მოდელისთვის არის ხელმისაწვდომი. სულ მყიდველს სამ პაკეტს სთავაზობენ, რომელთა ფასებიც, 360.37, 482 და 887.56 სტერლინგია. ამასთან, მათში შემავალი ცალკეული აქსესუარების შეძენაც შესაძლებელია.