„ლენდ როვერის“ ორი ავტომობილი მსოფლიოს წლის ავტომობილის ფინალში

კონკურს „მსოფლიოს წლის ავტომობილის“ ჟიურიმ, რომელშიც საავტომობილო თემაზე მწერალი 82 ჟურნალისტი შედის, წლევანდელი კონკურსის ფინალისტების სია გამოაქვეყნა. მასში სულ ექვსი ქროსოვერი და ოთხი სედანი შევიდა. ქროსოვერებს შორის ორი „ლენდ როვერს“ ეკუთვნის. ესენია „ლენდ როვერ დისქავერი“ და „რეინჯ როვერ ველარი“.

გამარჯვებულები ცალკეულ კატეგორიებშიც გამოვლინდება. ესენია: ლუქს კლასის საუკეთესო ავტომობილი, საუკეთესო სპორტული ავტომობილი, საუკეთესო მწვანე ავტომობილი, საუკეთესო საქალაქო ავტომობილი და საუკეთესო დიზაინის მქონე ავტომობილი. „რეინჯ როვერ ველარი“ საუკეთესო დიზაინის კატეგორიის ფინალშიც გავიდა.

ჟიური ფინალისტთა შემცირებულ სიას ჟენევის მოტორ შოუზე გამოაქვეყნებს, გამარჯვებულებს კი მარტშივე, ნიუ იორკის ავტო შოუზე დაასახელებს.