„იაგუარ E-პეისი“ - ახალი კომპაქტური სპორტული უგზოობის ავტომობილი

22 ივნისი.

„იაგუარმა“ გამოაცხადა, რომ მალე ბაზარზე უახლეს ავტომობილს, უგზოობის კომპაქტურ „E-პეისს“ წარადგენს. ამგვარად, „პეის“ ოჯახში შემავალი მოდელების რაოდენობა სამამდე გაიზრდება. მასში უკვე შედის „F-პეისი“, რომლის წყალობითაც ბრიტანული ბრენდის გაყიდვები 83 პროცენტით გაიზარდა.

გარდა ამისა, მალე დაიწყება ელექტრომობილ „I-პერისის“ წარმოება, რომელიც ბაზარზე მომავალ წელს უნდა გამოვიდეს. „იაგუარი“ იმედოვნებს, რომ „E-პეისი“ მის გაყიდვებს კიდევ უფრო გაზრდის. ის მყიდველს სპორტული ხასიათით, შესაბამისი დიზაინით და რა თქმა უნდა, უახლესი ტექნოლოგიებით მიიზიდავს.

ახალი ავტომობილი აღიჭურვება სერია ინჯენიუმის ბენზინის და დიზელის ძრავებით და სრულ ამძრავიანი ტრანსმისიით. მის ეკიპირებაში, კავშირის და უსაფრთხოების უახლესი სისტემები შევა. ამ ეტაპზე, „იაგუარი“ თავისი სიახლის შესახებ მხოლოდ მწირი ინფორმაციის და ფოტო ტიზერების გავრცელებით შემოიფარგლა.